Pas nënshkrimit të Memorandumit të Bashkëpunimit trepalësh, Kryekomisioneri Ilirjan Celibashi u takua me ambasadorin e Gjermanisë në Shqipëri, SH.T.Z. Karl Bergner, dhe Kreun e zyrës së Këshillit të Evropës në Tiranë, Giulia Re. Në kuadër të rritjes së standardeve zgjedhore, z. Celibashi theksoi rëndësinë e programit për angazhimin e të rinjve në proceset demokratike, promovimin e edukimit sistematik për votuesit për herë të parë dhe shtrirjen e edukimit elektoral tek komisionerët dhe trajnerët e ardhshëm.

Ambasadori Bergner theksoi rëndësinë e pjesëmarrjes së të rinjve në zgjedhje por gjithashtu nevojën për iniciativa që mbështesin të rinjtë për të kuptuar të drejtat e tyre, ndërsa znj. Re shprehu mbështetjen e vazhdueshme për KQZ-në dhe vlerësoi angazhimin e institucioneve të përfshira për qëndrueshmërinë e programit. Drejtoresha e Përgjithshme e Agjencisë Kombëtare të Arsimit Parauniversitar, Rezarta Alla, dhe drejtori i Akademinë e Studimeve Politike, Erjon Tase, theksuan vlerën e shtuar të programit për edukimin e të rinjve për të drejtat e tyre dhe rritjen e pjesëmarrjes së tyre në zgjedhje.

Programi i edukimit të votuesve të rinj synon të integrojë edukimin elektoral në sistemin shkollor dhe të promovojë përfshirjen e të rinjve në proceset e vendimmarrjes demokratike të vendit.