Առողջապահության ոլորտում էթիկական գործելակերպի խթանմանն ուղղված լայն ջանքերի շրջանակում Հայաստանի Հանրապետության կառավարության որոշման համաձայն՝ սկսած 2025 թվականի սեպտեմբերի 1-ից «Բուժաշխատողների մասնագիտական էթիկայի կանոններ» վերաբերյալ վերապատրաստման դասընթացները համարվում են պարտադիր բոլոր բուժաշխատողների համար։ Հետևաբար, ավագ և միջին բուժաշխատողները շարունակական մասնագիտական զարգացման յուրաքանչյուր հնգամյա շրջափուլում պարտադիր կարգով պետք է կուտակեն 10 ՇՄԶ (շարունակական մասնագիտական զարգացման) կրեդիտ «Բուժաշխատողների մասնագիտական էթիկայի կանոններ» դասընթացից։ Այս պահանջը ներառված է հավաստագրման նպատակով օրենքով սահմանված ՇՄԶ կրեդիտների նվազագույն քանակի մեջ (220 ՇՄԶ կրեդիտ՝ ավագ բուժաշխատողների համար և 140 ՇՄԶ կրեդիտ՝ միջին օղակի բուժաշխատողների համար)։
Այս նախաձեռնությանը նպաստելու և առողջապահության ոլորտում պացիենտակենտրոն մոտեցումը խթանելու նպատակով Եվրոպայի խորհուրդը, ՀՀ ԱՆ ակադեմիկոս Ս․ Ավդալբեկյանի անվան Առողջապահության ազգային ինստիտուտի հետ սերտ համագործակցությամբ, կազմակերպել է բուժաշխատողների էթիկայի կանոնների վերաբերյալ երկու երկօրյա դասընթացներ, որոնք անցկացվել են մայիսի 13–15-ին և մայիսի 22–23-ին։ Դրանց մասնակցել է 70 բուժաշխատող, ներառյալ՝ փախստական բուժաշխատողներ։
Դասընթացների ընթացքում մասնակիցները ուսումնասիրել են առողջապահության ոլորտում էթիկայի եվրոպական և ազգային ստանդարտները՝ կենտրոնանալով պացիենտ–բուժաշխատող հարաբերություններում էթիկական նորմերի, շահերի բախման բացակայության, ինչպես նաև բժշկական գաղտնիքի և տեղեկացված համաձայնության սկզբունքների վրա։ Ծրագիրը համադրել է փորձագետների կողմից անցկացվող դասախոսությունները դերային խաղերի, իրավիճակային դեպքերի վերլուծության և գործնական վարժությունների հետ։
Այս դասընթացները մեծապես նպաստում են բուժաշխատողների հավաստագրմանը՝ միաժամանակ ամրապնդելով բարեվարքությունը, մասնագիտական վարքագիծը և պացիենտակենտրոն խնամքը՝ ի շահ հանրության։
Միջոցառումը կազմակերպվել էր Եվրոպայի խորհրդի՝ «Մարդու իրավունքները կենսաբժշկության մեջ III» ծրագրի շրջանակում, որն իրականացվում է Եվրոպայի խորհրդի՝ Հայաստանի համար 2023-2026թթ գործողությունների ծրագրի շրջանակում։
