12 траўня 2026 года ў рамках свайго афіцыйнага візіту ў Літву Генеральны сакратар Рады Еўропы Ален Берсэ ўрачыста адкрыў Інфармацыйны пункт для беларусаў пры Літоўскай нацыянальнай бібліятэцы імя Марцінаса Мажвідаса ў Вільнюсе.
«Доўгатэрміновым прыярытэтам знешняй палітыкі Літвы з'яўляюцца абарона дэмакратычных каштоўнасцей ад агрэсіі і аўтарытарызму, падтрымка грамадзянскай супольнасці і незалежных медыя ў Беларусі ды іншых краінах, якія знаходзяцца пад уладай аўтарытарных рэжымаў, а таксама падтрымка праваабаронцаў, якія працуюць у выгнанні» – падкрэсліў у сваёй прамове на цырымоніі адкрыцця міністр замежных спраў Літвы Кястуціс Будрыс. «Мы радыя, што Літва, якая паспяхова прайшла ўласны шлях дэмакратычных пераўтварэнняў, сёння можа прапанаваць бяспечную прастору для беларусаў, якія імкнуцца да дэмакратычных зменаў у сваёй краіне», – дадаў міністр.
Генеральны сакратар Рады Еўропы Ален Берсэ падзякаваў ураду Літвы за яго нястомную падтрымку і за стварэнне Інфармацыйнага пункта, а таксама пацвердзіў імкненне арганізацыі спрыяць станаўленню Беларусі, свабоднай ад рэпрэсій і дэзінфармацыі.
«Рада Еўропы застаецца адданай праўдзе, а не хлусні; фактам, а не выдумкам; інфармацыі, а не дэзінфармацыі. І мы надалей будзем падтрымліваць незалежную і дэмакратычную Беларусь», – адзначыў ён.
Ален Берсэ высока ацаніў мужнасць і адданасць беларускіх дэмакратычных сіл і адзначыў лідарства Святланы Ціханоўскай.
«Гэты Інфармацыйны пункт спросціць узаемадзеянне паміж Радай Еўропы і тымі, хто верыць у дэмакратычную Беларусь, – падкрэсліў Ален Берсэ. – Ён зблізіць нас яшчэ больш. Гэта сімвал супрацоўніцтва, які паўстае тады, калі нашым каштоўнасцям ва ўсёй Еўропе пагражаюць раскол і супрацьстаянне».
Святлана Ціханоўская, кіраўніца Аб'яднанага пераходнага кабінета Беларусі, заявіла: «Гэта важная падзея для беларусаў і істотны крок да вяртання Беларусі на карту Еўропы. Я заўсёды кажу: нам патрэбна больш Беларусі ў Радзе Еўропы і больш Рады Еўропы ў Беларусі».
«Рада Еўропы ўвасабляе тыя самыя каштоўнасці, за якія сёння змагаюцца беларусы: правы чалавека, дэмакратыю, вяршэнства права і павагу да чалавечай годнасці. Я веру, што настане дзень, калі Беларусь стане паўнапраўнай удзельніцай гэтай арганізацыі. Спадзяюся, што Інфармацыйны пункт у Вільні дапаможа наблізіць Беларусь да гэтай мэты і дасць беларусам магчымасць шырэй карыстацца досведам, рэсурсамі і магчымасцямі Рады Еўропы», – адзначыла яна.
Дадатковая інфармацыя:
Запыты СМІ можна дасылаць у