Më 13 maj 2019, Kreu i Zyrës së Këshillit të Evropës në Tiranë, Jutta Gützkow, iu drejtua pjesëmarrësve në "Ditën e Hapur: Të Drejtat LGBTI janë të Drejtat e Njeriut", të organizuara nga Avokati i Popullit, Erinda Ballanca. Aktiviteti është pjesë e axhendës që shënon Ditën Ndërkombëtare Kundër Homofobisë, Transfobisë dhe Bifobisë (IDAHOT) dhe synon rritjen e ndërgjegjësimit për shkeljet e të drejtave të komunitetit LGBTI dhe nxitjen e vizibilitetit të aktivizmit të tyre.

Duke folur për pjesëmarrësit, znj. Gützkow, vuri në dukje se të drejtat e komunitetit LGBTI janë të bazuara në parimet e barazisë dhe mosdiskriminimit në qasjen në të drejtat themelore, siç parashikohet nga Konventa Evropiane për të Drejtat e Njeriut. Ajo gjithashtu përmendi parimet kryesore të përfshira në Planin e ri të Veprimit të Këshillit të Evropës për Ndërtimin e Shoqërive Përfshirëse, duke përfshirë ekzistencën e ndërlidhshmërisë dhe diskriminimit të shumëfishtë me të cilin përballen individët e komunitetit LGBTI; rëndësinë e edukimit mbi diversitetin; dhe nevojën për të luftuar racizmin, intolerancën, diskriminimin dhe gjuhën e urrejtjes për një shoqëri gjithëpërfshirëse.

Anëtarët e komunitetit LGBTI të pranishëm kontribuan në diskutimin dhe ofruan një pasqyrë të situatës aktuale dhe prioriteteve në luftën kundër diskriminimit dhe intolerancës me të cilën përballet komuniteti LGBTI në Shqipëri.

Zyra e Këshillit të Evropës në Tiranë ka mbështetur aktivisht kapacitetet institucionale, iniciativat dhe aktivitetet e ndryshme të organizuara me komunitetin LGBTI në Shqipëri gjatë viteve të fundit dhe do të vazhdojë bashkëpunimin e ngushtë me institucionet dhe organizatat e shoqërisë civile që punojnë në mbrojtjen e të drejtave të njeriut dhe promovimi i barazisë dhe mosdiskriminimit.