Më 10 nëntor, përfaqësues të lartë të institucioneve kryesore shqiptare përfitues të projektit të përbashkët të Bashkimit Evropian dhe Këshillit të Evropës “Veprimi kundër Krimit Ekonomik në Shqipëri” vlerësuan progresin e arritur gjatë gjashtë muajve të fundit duke u fokusuar në kuadrin ligjor dhe rregullator si dhe konsolidimin e kapaciteteve të tyre në kuadër të luftës kundër korrupsionit, pastrimit të parave dhe financimit të terrorizmit.

Ata vlerësuan mbështetjen e Projektit në forcimin e mekanizmave legjislativë dhe institucionalë kundër pastrimit të parave në lidhje me bashkëpunimin gjyqësor ndërkombëtar në çështjet penale, si dhe përmirësimin e ligjit “Për noterinë në Shqipëri” në përputhje me rekomandimet e MONEYVAL.

Inspektori i Përgjithshëm për Deklarimin dhe Kontrollin e Pasurive dhe Konfliktit të Interesave theksoi ndihmën e vazhdueshme dhe të vlefshme të Projektit për vënien në zbatim dhe funksionimin efektiv të sistemit elektronik të deklarimit të pasurisë, përmes asistencës të së cilit 140 përfaqësues të autoriteteve publike u pajisën me aftësi teknike dhe njohuri praktike në lidhje me përdorimin e këtij sistemi elektronik, ndërkohë që 200 përfaqësues të tjerë do të trajnohen brenda muajit nëntor 2021.

Në të njëjtën linjë, përfaqësuesja e Komisionit Qendror të Zgjedhjeve (KQZ) njohu mbështetjen e Projektit për rishikimin e akteve nënligjore për zbatimin e Kodit Zgjedhor për financimin e fushatës zgjedhore dhe keqpërdorimin e burimeve shtetërore, duke përfshirë rritjen e kapaciteteve të 100 përfaqësuesve nga stafi i KQZ-së, organizata të shoqërisë civile dhe monitorues.

Më tej, të pranishmit diskutuan për planin e ardhshëm të aktiviteteve dhe rikonfirmuan rëndësinë e bashkëpunimit të vazhdueshëm në drejtim të parandalimit dhe luftës kundër krimit ekonomik.

Veprimi Kundër Krimit Ekonomik në Shqipëri është pjesë e “Instrumentit Horizontal për Ballkanin Perëndimor dhe Turqinë II”, një program i përbashkët i Bashkimit Evropian dhe Këshillit të Evropës.