Me kërkesë të Këshillit të Lartë Gjyqësor (KLGJ), ekspertë të CEPEJ vizituan Tiranën më 12-14 shkurt në mbështetje të transferimit të përgjegjësisë për mbledhjen e statistikave nga Ministria e Drejtësisë tek KLGJ. Ekspertët e CEPEJ, së bashku me përfituesit kryesorë (KLGJ, Ministria e Drejtësisë, Inspektoriati i Lartë i Drejtësisë dhe kancelarët e gjykatave) vlerësuan nevojat e këtyre të fundit duke marrë parasysh standardet e CEPEJ në administrimin e gjykatave dhe administrimin e çështjeve, shembuj nga praktikat më të mira nga vendet e tjera evropiane, strategjitë e informatikës në cyberjustice, si dhe metodologjinë e CEPEJ në lidhje me mbledhjen e të dhënave.

Rekomandimet që ekspertët e CEPEJ do të japin janë thelbësore për KLGJ, e cila aktualisht është duke përgatitur rregullat standarde për efikasitetin e drejtësisë dhe metodologjinë për mbledhjen e të dhënave, në përgjigje të kuadrit të ri ligjor prej reformës në drejtësi. Ato do të kontribuojnë në përmirësimin e statistikave gjyqësore për një proces të qëndrueshëm dhe konsistent në mbledhjen dhe analizën e statistikave të besueshme në nivel kombëtar dhe lokal gjykatash.

Aktiviteti është organizuar në kuadër të projektit SEJ III - "Forcimi i Efikasitetit dhe Cilësisë së sistemit të Drejtësisë në Shqipëri", pjesë e programit "Instrumenti Horizontal për Ballkanin Perëndimor dhe Turqinë 2019-2022", i bashkëfinancuar nga Bashkimi Evropian dhe Këshilli i Evropës dhe i zbatuar nga Këshilli i Evropës.