2020 წლის 17 ივლისს ევროპის საბჭოს ორგანიზებით გაიმართა პერსონალურ მონაცემთა დაცვისა და პირადი ცხოვრების ხელშეუხებლობის HELP-ის დისტანციური კურსის მონაწილეებისთვის სერტიფიკატების გადაცემის ცერემონია.
ღონისძიებაზე მისასალმებელი სიტყვით გამოვიდნენ სახელმწიფო ინსპექტორი ლონდა თოლორაია და ევროპის საბჭოს ოფისის ხელმძღვანელის მოადგილე საქართველოში ვაჰაგ მურადიანი.
ეს არის პირველი დისტანციური კურსი პერსონალურ მონაცემთა დაცვისა და პირადი ცხოვრების ხელშეუხებლობის შესახებ, რომელიც განხორციელდა ქართულ ენაზე. კურსი აერთიანებს ბოლოდროინდელ ინფორმაციას პერსონალურ მონაცემთა დაცვის ევროპული სტანდარტებისა და ამავე თემაზე არსებულ საქართველოს კანონმდებლობას და პრაქტიკას. პირველი ჯგუფის მონაწილეები იყვნენ საქართველოს სახელწიფო ინსპექტორის სამსახურის თანამშრომლები, რომლებმაც წარმატებით გაიარეს კურსი. ღონისძიების შემდეგ გაიმართა სამუშაო შეხვედრა, რომელზეც მონაწილეებმა ევროპის საბჭოს და სახელმწიფო ინსპექტორის სამსახურის წარმომადგენლებთან ერთად განიხილეს კურსის შედეგები და რეკომენდაციები.
ღონისძიება გაიმართა ევროპის საბჭოს პროექტის „მედიისა და ინტერნეტის თავისუფლების ხელშეწყობა საქართველოში” მხარდაჭერით.
